Dr Remo Berger isch in Chur ufgwachsa und hät als junga Schnuufer d Lehr als Laschtwaga-Mechaniker bi Saurer absolviart. 1976 hät er sini Fahrschual gründet. Er isch Fahrlehrer für alli Kategoria. Sit 1986 isch er im Bsitz vum Verkehrslehrer-Diplom. So näbabii isch er no Prüafigs-Expert für Fahrlehrer-Prüafiga in dr Oschtschwiizerischa Fahrlehrer-Prüafigskommission. Am Remo sis Hobby isch sini Firma (drum isch er au ständig 200% im Iisatz...)
Sie hät üssers Sekretariat scho im 1994 as Johr gfüart. Nochär isch si für 10 Johr nach Genf. Döt hätt Si d'Usbildig zur Direkzions Assistentin gmacht und dä Job au usgfüart.
Wia sich's ghört Bündnerinna dörfen Heimweh ha, isch dia gebora Puschlaverin wieder zu üs in d'bündner Berga zruggko. Sie isch für alli Froga rund um Us und Witerbildig di richtig Aschprechperson. Nebabi managt Sie dia ganz Administration vo üssara Fahrschual. Ihri Hobbys sind: Feria, Usflüüg z'Fuass und mitam Töff !
Sit 1993 isch dr Fritz in dr Fahrschual Berger, als Motorrad- und Autofahrlehrer. Uf dem Gebiat isch er dr Schpezialischt.
In siner Freizit trifft ma ihn zum Bischpiel ama Fluss am fischa oder (wenn er d Fisch nit grad selber zuabereitet) imana feina Reschtorant. Am liabschta unternimmt er aber öppis mit sina 2 Kinder, dr Hannah und am Tom. Übrigens hät er sich sit Johra als absoluta Motorrad-Profi-Touraleiter bi Sunna, Räga und au Schnee beschtens profiliart!
D Natalia isch dia Jüngscht im Team. Im 2002 hät sie d Handelsmittel-schual in Chur abgschlossa, im 2003 no d Bruafsmatura hinter sich brocht und im 2006 hät sie sich zur Auto-Fahrlehrerin usbilda loh.
Wenn sie nit grad uf oder im BMW hockt, sitzt sie wohrschiinli am Klaviar oder schtoht hinter am Mikrofonständer. Denn Musik isch näbam Auto- und Laschtwagafahra ihri grösscht Liidaschaft.
Dr Beat isch sit 1989 Fahrlehrer für alli Kategoria. Als Grundusbildig hät är Laschtwagamechaniker glernt. Schpöter hät er verschidani Tätigkeita erfahra, z. B. Schofför für Schwertranspört. Poscht und Busfahrer, Ushilfsschofför bi Sauber Petronas.
Usbildig als Instruktor, dänn Scheffinstruktor für Töff und Laschtwaga im Verkehrssicherheitszentrum Betzholz bi Hinwil. 2 Phasen Moderator für Neulenker. Moderator für Us- und Witerbildig uf Rennschtrecka und Pischta im In- und Usland. Lehrer für di obligatorisch Witerbildig für Bruafsfahrer und Scheffinstruktor im DrivingGraubünden Cazis für Us- und Witerbildig für alli Fahrzüglenker.
Hobbys: wenn no zit drfür, Familia, Motorrad (Trial, Enduro und Schtross) Biken und Skifahren
Beat Bislin Lampacher
